نقد الكبار للصغار

( وجهة نظر )

- عارفين ليه جيلنا طالع بعيد عن أهله  وعلى طول بيفضل صحابه أو الخروجات أو الوحدة أو حتي النوم ..

- علشان الوقت اللي بيقضيه معاهم كله انتقاد لكُل كبيرة وصُغيرة ايه اللي انت عامله فـ شعرك دا ، ايه اللي انت لابسه دا ، ايه الزفت اللي بتتفرج عليه دا ، خليك كده قاعد قدام الزفت دا ليل نهار لحد ما تموت ، انت أزاي تتكلم بالطريقة دي ، كفاية كلام فـ التليفون أنت ودانك موجعتكش ، خليك كده طول اليوم بره والبيت بقا فندق للنوم ، خليك كده ماشي ورا دماغك ومتسمعش كلامي ، تستاهل أنتوا جيل فاشل ومنيل أساساً ، وطي صوتك ، علِّي صوتك ، اقعد عدل ، وطي الزفت اللي انت مشغله دا ، نام بقا ، اصحى كفاية نوم ، سهران ليه ، انت مفيش فايده فيك ، خليكي كده قاعده وشك فـ وشى لحد ما تعنسي ، بطلى دلع شوية ، خليكى جد شوية وبطلى الدلع دا ، مفيش خروجات ، هتتخطبي لإبن خالتك ، خليكى ورا كذا مش هتنفعك ، بطلى فرجه على مسلسلات شوية ، انتى مبتتفرجيش معانا على التليفزيون ليه ، بتعمل ايه وبتعملى ايه وغيره وغيره .

- ولو قررت تقعد لوحدك علشان تعبت من الانتقاد والرخامة والصد يسألوك ببراءة - انت ليه مبتقعدش معانا ودايماً قاعــد لوحدكـ .

- إملوا حياة أولادكم بالمدح ، وسمعوهم الكلام اللي نفسهم يسمعوه منكم ، بدل ما يدورو على حد بره يسمعهُلهم ، حسسوهم أنكم قابلينهم بـ أي حاجة متخلفة بيعملوها ، حتي لو كان ابنك قرر انه يحلق نص شعره زيرو ويسيب النص التاني كــانيش ، اقتلوا اختلافكم عنهم .

- لازم ابنك يعدي برحلة التمرد علشان يبقي عنده شخصية بعد كده يقبل أو يرفض ميبقاش بيقول على كُل حاجة نعم .

- اسمعوا منهم مبرارتهم حتى لو من جواكم عارفين إنها غلط ، ادوهم فرصة يعبروا عـن رأيهم ، اختاروا الوقت المُناسب اللى تعرفوهم فيه غلطهم مش وهما متعصبين أو مقهورين أو مظلومين ، علشان ميحسوش بالشماته وانتوا مش شمتانين ، راجعوا كلامكم وانتوا تعرفوا بيهربوا منكم ليه وبيلجاؤا لغيركم .

" في أوقات كتير بنحس إننا مش ولادهم وعلى طول بيجي في دماغنا مشهد الفنان الراحل عبدالحليم حافظ مع الفنان عماد حمدي " إنت مش ابني ، احنا لاقيناك قدام المعبد اليهوووووودي 😃 "

" قد يكون الوقت عدى خلاص على بعض الأباء والأمهات واتعودوا ودا بقا طبعهم ، لكن دا لينا أحنا كأجيال طالعة إزاي نعامل ولادنا ونبنيهم مش نهدهم ونستثمر فيهم مش ليهم "