الاختيار الصح

 "الله مش مسئول عن جرحك العاطفي.. أنت اللي اخترت غلط! ..

الله مش مسئول عن فشلك الدراسي، أنت اللي مذكرتش عِدل! ..

الله مش مسئول عن ارتباطك الفاشل، أنت اللي صممت تكمل رغم وضوح النتيجة من البداية..

الله مش مسئول عن جروح ناس كتير سابتها في حياتك، ما أنت بتسيب جروح في حياة ناس كتير تانية عشان أنت حُر زيك زيهم..

الله برضو مش مسئول يخليك الصورة اللي في دماغك عن نفسك، ده إلهك مش "مصباح علاء الدين" ينفذلك اللي أنت عايزه..

الله مش مسئول عن كلام مطلعش منه أنت تخيلته وعدك بيه عشان نفسك يحصل، أنت المسئول عن استقبالك للكلام وتوقعاتك الغير ناضجة.. 

الله برضو مش مسئول يتحرك في مناطق هو مديك المسئولية تتحرك فيها، صدقني ده مش تسليم منك، ده تواكل وهروب من المسئولية!..

نصيحتين في الاخر: 

 ⁃ ارجوك ماتنسبش حاجات لله هو معملهاش خوفاً من تحمّل مسئولية قراراتك، ده مش هايحل المشكلة ده هايزودها ويزود مشكلتلك مع الله أكتر، اعرف حدود شغل الله في حياتك (نتيجة انه مديك حرية وبيعاملك كشخص مسئول)، وابتدي اشتغل بدل ما أنت قاعد مستنيه يتحرك بدالك (وصدقني ده مش هايحصل).

 ⁃ أنت مش محتاج وعود جديدة من الله، ولا محتاج معجزة تغيرلك الواقع بتاعك اللي مش على مزاجك.. أنت بس محتاج تغير دماغك وتنشف شوية عشان تغير الواقع ده!

اختار صح عشان تعرف تكمّل ..تعرف تواجه الدُنيا بكل ّمتاعبها وانت واقف على أرض صلبة ..

اختار صح لأن دي فُرصتك الوحيدة في حياتك في الإختيار

 اختار اللي تعرف ترمي علي كتفهُ همومك من غير لا يشتكي ولا يملّ اللّي ينفع يبقى وطن مش مُجرد تابع لأهوائك اللي نسي بيك كل اللى عرفهم قبلك و يمسح بأستيكة أي حد بعدك اللي في وجودك وطن و في غيابك جبَل ما تحركوش نظرة ولا تأسره كلمة ولا تغيّره روح ...

اختار اللي يتحمّل صدمات العالم في سبيلك ....

ما تجازفش في علاقة تهد حيلك ..

اختار اللي يبنيك مش اللي يهد ّ فيك ...

اختار صح عشان تعرف تعيش ...