لو معاك قرشين وقررت انك تفتح مشروع وسألت أى حد معدى فى الشارع أفتح أيه هيقولك أفتح مطعم وده لأن الشعب المصرى مبيبطلش أكل معروف عننا من زمان إننا شعب أكيل وإن الأكل دايمآ مرتبط معانا بكل المناسبات نفرح ناكل نزعل ناكل نكتئب ناكل ودايمآ رابطين الأكل بأى حاجة بتحصل النهارده هنعرف أصل أشهر الأكلات المصرية وازاى بدأت تتعمل فى مصر طبعآ.
👩🍳أول وأهم أكلة هى:-
الملوخية☘️ شامم ريحة التألية اول ما قولت كلمة ملوخية معروف إن الملوخية هى أكتر أكلة المصريين بيحبوها وبداية الملوخية كانت فى مصر الفاطمية وظهرت كنبات كان بيزرعه حكام مصر و بياكلوه بعد الطبخ وبيقال إن الحاكم بأمر الله كان مانع عامة الشعب إنهم ياكلوا الملوخية عشان ميتقارنوش بالحكام وفيه مؤرخين تانيين بيقولوا إن الفراعنة عرفوا الملوخية قبل الفاطميين.
👩🍳أما تانى أكلة فهى إدمان المصريين كلهم الأكلة اللى بناكلها فى أطباق عادية واطباق بلاستيك واكياس ولو عرفنا ناخدها حقن مش هنقول لا.
الكشرى 🍝 من أهم الأكلات الشعبية فى مصر وظهر فى مصر بعد ما وصفه الرحاله ابن بطوطة فى كتابة تحفه النظار فى غرائب الأمصار وعجائب الأسفار واللى قال فيه عن الهنود إنهم بياكلوا أكلة من الرز والشعير والسمنة وبتتسمى هناك كشرى ومع الوقت حركة التجارة اتنقلت الأكلة لمصر وإتطورت من مجرد رز وشعير للشكل الحالى اللى كلنا نعرفة.
👩🍳تالت أكلة هى :-
الطعمية🥙 لو أنت من القاهره أو فلافل لو أنت اسكندرانى بيقال إن الأقباط المصريين هما اللى ابتكروها علشان تكون بديل للحمه فى أيام الصيام كل ده مش مهم المهم إنك تصحى الصبح تنزل على اي مطعم تجيبها سخنه وبسمسم ومعاها رغيف عيش وشوية طماطم 🍅 مقطعه لا تقولى فطار فرنساوى ولا ايطالى بعد كده ندخل ع المسقعه.
المسقعه 🍆 فى اختلاف حوالين أصل المسقعه ياترى هى أكلة يونانى ولا ايطالى بس الاكيد إن مصر عرفتها فى القرن ال ١٩ البتنجان العايم فى الصلصة مع البصل والفلفل اكله تاكلها من هنا وصدرك يولع من هنا بس مفيش اختلاف إن طعمها ميتقاومش وخصوصا لو معموله من أيد ست مصرية أصيلة.
ندخل بقى على الراعى الرسمى للتخن والكالوريز 🙆♀️
الفطير المشلتت 🍘 هى أكله فلاحى انتشرت فى الريف المصرى وتعتبر أقدم فطيرة فى التاريخ لأن المصريين القدماء كانوا بيقدموها قربان للآلهه فى المعابد وكانوا بيحطوها مع المتوفى فى قبره كمان وبيرجع أصل تسميتها لكلمه الفطير الملتوت يعنى اللى له طبقات وحاليا بقى جزء مهم من ثقافه المصريين وهدية محترمة من أى حد فى الريف لأخوه المعذب فى القاهره الحزينة وبيقال إن فكرة الفطير المشلتت راحت لأوروبا فى القرن ال ١٩ واتطور لحد ما عملوا منه الكرواسون 🥐 فى فرنسا 🇫🇷
الحاجه الوحيده المفيده اللى طلعنا بيها من تركيا 🇹🇷
المحشي 🍱
عرفوه المصريين فى فترة الحكم العثمانى وكان اسمه دولمه المصريين خدوه وحطو عليه التاتش بتاعهم وبقى اسمه المحشى أكله ميختلفش عليها أتنين لو انت معزوم عند حد بيحبك مينفعش العزومه تكون من غير محشى مش بس المصريين اللي بيحبوا المحشى
المحشى أكله اساسية فى سوريا والعراق وتركيا باختلاف المسمى والحشو والتوابل
لو عملت شير هديك صوبع محشى 😊
الله ينور عالملوخية يا جمالوا يا جمالوا :D
ردحذف