طيب بصوا يا ريت الناس تركز في الكلام الي جاي دا ، و مش قصدي اعمل قلق و الله بس احنا محتاجين الناس تبقي شايفه و فاهمة الفترة الي احنا فيها و الي احنا داخلين عليه شكله ايه ، و بالتالي تصرفاتنا تبقي مسئولة و واعية علي قدر صعوبتها :
-دلوقتي الدايرة أبتدت تضيق بشكل ملحوظ ب معني بقينا نلاقي في دواير معارفنا مصابين بالكورونا بعد ما كان الموضوع مجرد اصابات بنسمع عنها في الاخبار او السوشيال ميديا
-الاعداد المعلنة اليومية من وزاره الصحة زادت بشكل ملحوظ رغم اننا مش بنعمل تحليل عشوائي برضه و دا معناه ان الاعداد الحقيقية اكبر ب كتير من المعلنة ( و دا تم الاشارة ليه من وزير التعليم العالي )
-فيه ظاهره غريبه و مقلقة و هي ان في اخر يومين شوفنا وفاة لدكاتره و اشخاص عمرهم لم يتجاوز ال٤٠ سنة و مش بيعانوا من اي اعراض مزمنة ، شباب زي الفل !! دا لوحده محتاجين يتفتح ليه تحقيق جنب تحقيق معدل وفاة افراد الاطقم الطبية مقارنه بنسبه الوفيات كلها ( النسبة مرتفعة جداً )
-الضغط يولد الانفجار و مع زياده الحالات ابتدت الاطباء و الاطقم الطبية تقع مننا و تيأس مع وجود تخاذل واضح من وزاره الصحة في توفير اساليب و وسائل الوقاية ليهم !
-اطباء كتير بدأت تلوح بالاستقالة و ترك المهمة لأنهم شايفين ان حياتهم في خطر و مفيش اي نوع من انواع التقدير ليهم او حتي اي اهتمام بيهم و بسلامتهم !
-انهارده كمان بقينا نسمع عن حالات كتير بيتقالها مفيش مكان و ناس كتير بتشتكي ان بطلوا يلاقوا رد بخصوص حالاتهم ! و ناس مش لاقيه ادوية ولا علاج و مشاكل لا حصر لها
-قرية في الشرقية اسمها الرحمانية الاسبوع دا مات فيها ٣ اخوات بسبب الكورونا و الدنيا مقلوبة هناك و الاهالي كلها خايفه بعد ما شافوا بعينيهم الي حصل لعيلة واحده ضربها المرض !
بالتأكيد احنا في فترة مش سهلة للاسف و محتاجين مجهود كبير و حاجات كتير تتعمل عشان نقدر نعديها ، اولها هي تخفيف الضغط و وقف سرعة الانتشار الرهيبه الي بنشوفها دي !
مع الكلام علي عودة الحياه و اعاده الفتح و الكلام دا كله الوضع متوقع هيسوء اكتر لو كملنا بنفس الشكل بسبب التجمعات الي هتحصل في المواصلات و المصالح و الاسواق و غيرها ! للأسف احنا اه خايفين الناس ماتلاقيش تاكل بس برضه المرض مش سهل و الي انهارده بيشتكي من وقف الحال بكره هيشتكي اكتر من ان مفيش مكان لسرير ليه في المستشفي ! و الغلابة دول غير رجال الاعمال الي بيزنوا عالفتح الي بفلوسه هيتعالج في احسن مستشفي خاصه !
علي الحكومة انها تحل مشاكل الاطباء و توفر ليهم كل الاولية في الفترة الحالية و تعيد حسابتها فيما يخص آليات الفترة الجايه !
و انتوا ساعدوا نفسكم و بلدكم و اطبائكم بتجنب كل ما هو غير ضروري ! فسح ، خروجات ، تجمعات عائلية و غيرها من الحاجات الي خطورتها اعلي كتير من اهميتها ! انسوا شويه كل دا الفترة دي عشان خاطر سلامتكم و سلامة اهاليكم !
و ارجعوا تاني اهتموا بالتوعية و الوقايه ! عارفين الناس زهقت بس صدقوني حياتكم و سلامتكم اهم ! و المرض و الله ما سهل ! ولا فيه حاجه تسوي قلقكم علي اهلك ولا نفسك و انت مفيش في ايدك حاجه تعملها !
الالتزام و الحرص هو العلاج و الامان الوحيد و الحل السهل في الوقت دا !
و بأذن الله فترة و تعدي .. بس عايزينها تعدي من غير ما نخسر حد من حبايبنا و اهالينا .. و ربنا يسترها علينا ان شاء الله
ليست هناك تعليقات:
إرسال تعليق
اكتب تعليقك اذا كان لديك أى تسائل عن الموضوع وسنجيبك فور مشاهده تعليقك